Gunnlaugur og Sigmundur Davíð og pokahornin!

Ég er að fara til USA á morgun og gæti orðið þar í einhverjar vikur að hjúkra syni mínum.

Ég get þó ekki látið hjá líða að benda á eftirfarandi tengla af Málefnin.com vegna þess að ekki er alltaf hreint mjöl í öllum pokahornum!

Gunnlaugur og Kögun:

http://www.malefnin.com/ib/index.php?showtopic=89604&st=30&start=30

Sigmundur og fjármagnstekjuskatturinn:

http://www.malefnin.com/ib/index.php?s=bf8624b8fb95c898112b7aa06ddf1331&showtopic=112951&pid=1420111&st=20&#entry1420111

Sannleiksgildi þessara færslna hef ég ekki skoðað en að borga á annað hundrað milljónir í fjármagnstekjuskatt bendir til talsverðra eigna - 1200-1300 milljónir!!!   

 


Nýr forstjóri FME lærir af þeim gamla!

Væri nú ekki gráupplagt að drífa í því að ráða nýjan forstjóra til Fjármálaeftirlitsins strax?   Þá hefði hann heilan mánuð til að læra réttu handtökin við reksturinn af Jónasi áður en hann hættir þann 1. mars n.k.  Það er svo verðmætt að nýta reynslu svona manna eins og Jónasar og þurfa ekki að læra allt frá grunni!   Svo getur Jónas efalítið kynnt hann fyrir helstu kúnnunum, féflettunum! Wink  

Ekki gleyma FÉFLETTUNUM!

Nú virðast hlutirnir vera að ske - Björgvin farinn, Jónas hættir 1. mars og stjórnin e.t.v. á fallanda fæti.   Síðustu vikur hafa þó einkennst af því að féflettarnir sjálfir - þeir sem valdir voru að hruninu virðast hafa gleymst að mestu - að Ólafi Ólafssyni undanskildum en hann virðist enn vera við sama heygarðshornið og trúa á eigið sakleysi!    Sagði meira að segja að einhverjir væru að sverta mannorð sitt! Smile Maður hélt reyndar að það væri svart!

Mig langar í þessu tilefni að rifja upp listann yfir helstu féflettana og svona í framhaldinu nokkrar syndir og umræðuefni!     Þetta er að mestu tekið af Silfri Egils - ég vona að Egill fyrirgefi stuldinn sem þó er það smávægilegur að hann gæti verið saknæmur.Bandit

1.    Björgólfur Thor Björgólfsson   

2.    Björgólfur Guðmundsson   

3.    Magnús Þorsteinsson

4.    Ágúst Guðmundsson    

5.    Lýður Guðmundsson  

6.    Sigurður Einarsson  

7.    Hreiðar Már Sigurðsson  

8.    Jón Ásgeir Jóhannesson   

9.    Kristín Jóhannesdóttir  

10.  Ingibjörg Pálmadóttir  

11.  Gunnar Smári Egilsson   

12.  Gunnar Sigurðsson  

13.  Pálmi Haraldsson   

14.  Jóhannes Kristinsson 

15.  Magnús Ármann  

16.  Þorsteinn M. Jónsson  

17.  Kári Stefánsson       

18.  Hannes Smárason   

19.  Kristinn Björnsson  

20.  Magnús Kristinsson   

21.  Bjarni Ármannsson     

22.  Róbert Wessmann 

23.  Ólafur Ólafsson 

24.  Karl Wernersson  

25.  Þorsteinn Már Baldvinsson   

26.  Sigurjón Árnason    

27.  Halldór Kristjánsson."

 Þann 7. des. 2008 skrifaði bloggari sem nefndist AK 72 eftirfarandi pistil á Silfur Egils.    Við hann mætti vafalaust bæta ótal atriðum sem síðar hafa komið fram en hann er ágætur til upprifjunar á að syndirnar eru margar, dreifast víða og ættu ekki að gleymast. 

"Tveir mánuðir af ábyrgðarleysi

Bloggari sem nefnir sig AK-72 tók saman eftirfarandi lista. Því miður er þetta raunveruleikinn sem blasir við manni.

--- --- ---

Þegar ég sá ábendingu á Eyjunni um það, að sama endurskoðendafyrirtæki,
KPMG og sá um að kvitta upp á reikninga Glitnis, FL Group o.fl. fyrirtækja
sem stóðu í braski, skuli vera fengið til að rannsaka þau og sjálft sig í
raun, þá féllust mér hendur og vonleysið greip mig. Mér fannst eins og það
væri verið að senda okkur puttann enn eina ferðina og láta hina grunuðu
meðhöndla sönnunargögnin.

Í framhaldi af því fór hugurinn að líta yfir síðustu tvo mánuði og allt
það sem hefur komið fram úr rotnum innviðum samfélagsins sem er að hruni
komið, og hvað það er æpandi að hinir seku og grunuðu sitja sem fastast á
meðan almenningi er ætlað að þjást fyrir þá. Engin ábyrgð né nokkuð gert
til að stöðva óheiðarleikann eða byggja upp traust, og varð það eiginlega
til þess að ég ákvað að taka saman lista yfir sem mest af þessu og vonandi
bætir fólk við.

Endurskoðendur sem sáu um að fara yfir ársreikninga og annað hjá
bönkunum, eru nú að rannsaka það sem þeir klúðruðu í upphafi. Engin ábyrgð
af þeirra hálfu og liggja undir grun um óeðlileg vinnubrögð en samt
fengnir í það, að rannsaka viðskiptavini sína sem þeir samþykktu. Hafa
ekki verið rannsakaðir enn.

Bankamenn sem bera ábyrgð á IceSave, peningamarkaðsjóðum, vafasömum
viðskiptaháttum og blekkingum ýmiskonar, sitja enn. Engin rannsókn hefur
farið fram á gjörðum þeirra, heldur hafa þeir haft tvo mánuði til
gagnaeyðingar.

Stjórnendur FME sem áttu að fylgjast með og skoða hvort eitthvað
óeðlilegt hafi verð í gangi, sitja enn þrátt fyrir að hafa brugðist öllum
skyldum sínum. Hafa ekki þurft að sýna ábyrgð, heldur fengið aukin völd.

Starfsmenn Kaupþings sem stofnuðu ehf. til að færa skuldir vegna
hlutabréfakaupa inn í og skella í gjaldþrot með aðstoð bankans, sitja enn.
Ekkert gert til að taka á þessu.

Stjórn Kaupþings ákvað að fella niður skuldir “ómissandi” starfsmanna,
en segjast ekki ætla að gera það eftir fjölmiðlaumfjöllun. Enginn þarf að
víkja né sýnt fram á að slíkt verði hvorteð er ekki gert. Orð frá
bankamönnum er hreinlega ekki traustsins verð í dag.

Formaður VR sem sat í stjórn Kaupþings og vann gegn hagsmunum umbjóðenda
sinna, situr enn sem fastast í stéttarfélaginu og Lífeyrissjóðnum sem
notaður var til að fjárfesta fyrir auðmennina. Enga ábyrgð hefur hann sýnt
heldur stendur í því að múta trúnaðarmönnum með jólahlaðborðum.

Nýi bankastjóri Glitnis reynist hafa óhreint mjöl í pokanum með
verðbréfaviðskipti. Þarf enga ábyrgð að sína, heldur situr sem fastast.

Nýja bankastýra Glitnis hefur meiri áhyggjur af því að það fréttist um
vafasöm viðskipti bankans heldur en að vinna að heiðarleika og trausti með
því að leggja öll spil á borðið, og hefur hafið mannaveiðar innan bankans
í leið að “litla Glitnis-manninum”. Sá á að sýna ábyrgð, ólíkt stjórnendum
bankans.

Bankastýra Landsbankans, reynist hafa verið hægri hönd fyrrum
bankastjóra og mjög líklega með fulla vitneskju um stöðu bankans og
IceSave ásamt því að vera með puttana í vafasömum viðskiptum. Ekki hefur
verið neitt rannsakað með þátt hennar og hún situr sem fastast ásamt öðrum
stjórnendum.

Einn af ábyrgðarmönnunum á bak við IceSave er gerður að yfirmanni innra
eftirlits landsbankans og liggur undir grun um að vera að fegra sinn hlut
í því þannig. Enga ábyrgð þarf hann að sýna né hefur hlutur hans verið
rannsakaður.

Fyrrum yfirmaður verðbréfasviðs sem er grunaður um að hafa nýtt sér
upplýsingar sem hann hafði aðgang að sem ráðgjafi ríkistjórnar í
húsnæðismálum, til innherjaviðskipt, situr sem fastast í Landsbankanum og
er yfirhagfræðingur.

Greiningardeildirnar sem sáu um að ljúga að fólki, eru enn með sömu
yfirmenn og skipulögðu þessa fölsku auglýsingastarfsemi bankanna. Enn
halda fjölmiðlar áfram að sýna ábyrgðarleysi og spyrja einskis.

Þingmaður sem sat í stjórn Glitnis Sjóða, situr enn, þrátt fyrir að það
hafi verið ýmislegt vafasamt þar. Grunur um að 11 milljörðum hafi verið
dælt í Sjóð 9 til að bjarga honum, hefur ekki enn verð afsannaður.

Ráðuneytisstjóri sem grunaður er um að hafa nýtt sér upplýsingar, til að
losa sig við hlutabréf í Landsbankanum, situr sem fastast og hefur
yfirlýst traust ráðherra. Engin rannsókn hefur farið fram á athæfi hans,
heldur er slegið skjaldborg í kringum hann.

Auðmenn sem hafa skuldsett bankanna og fyrirtækin svo svakalega að
landið er á leið í þjóðargjaldþrot, fá að kaupa upp bestu bitana úr
þrotabúum eigin fyrirtækja og hafa stofnað sjóði til uppkaupa(Fönxi-sjóður
Straums er gott dæmi). Engin ábyrgð  fellur til þeirra handa né reynt að
hindra þennan hrægammahátt né eigur frystar eða handtökur farið fram.

Seðlabankastjóri gasprar og lætur allskonar rugl út úr sér í viðtölum
sem valda titringi á alþjóðavísu og er hugsanleg orsök að þriðji bankinn
fór í þrot. Enga ábyrgð hefur viðkomandi þurft að sýna heldur fær að sitja
sem fastast ásamt vanhæfri stjórn Seðlabankans, sem hefur tekið
stórskaðlegar ákvarðanir á borð við hringl með stýrivaxtahækkanir, lækkaða
bindiskylda til handa bönkunum og fleira sem hefur átt sinn þátt í að
skapa aðstæður fyrir þetta þjóðargjaldþrot.

Hafist er handa á fullu við það að selja Kaupþing í Luxemborg, þrátt
fyrir að rauður þráður vafasamra viðskipta auðmanna og bankamanna,
peningaþvætti og ýmislegt fleira vafasamt, liggi þar í gegn. Reynir er að
koma þessu í hendur fyrrum stjórnarformanns Kaupþings, svo hann geti
klárað gagna-eyðingu og hulið slóðina.

Glitnir afskrifar skuldir fyrirtækisins Stím, sem bankinn notaði til að
fjárfesta í sér og í FL group til að búa til viðskipti, Ábyrgðarlaust lán
og vafasamir viðskiptahættir hafa ekki enn fengið nokkurn mann til að
víkja.

Fyrrum Samvinnutryggingar, og núverandi Gift, hefur skyndilega farið frá
30 milljörðum í plús í svipað í mínus vegna þess að peningurinn var nýttur
til að sýna viðskipti með félög sem stjórnarmenn tengdust eða höfðu tengsl
við e.t.v. Enginn þarf að sæta ábyrgð, heldur er bara yppt öxlum af þeim
sem misnotuðu féð.

Ráðherrar sem virtust hafa haft pata af og vitað um hvert stefndi, sitja
sem fastast og vilja ekki víkja. Ábyrgð þeirra felst nefnilega í því að fá
launaseðilinn en ekki að víkja til að leyfa hæfari mönnum og ótengdum
mistökunum að taka við.

Þingmenn sem áttu að veita ráðherrum aðhald, sinna eftirliti og setja
lög til varnar því að svona færi, brugðust algjörlega og létu
flokksskírteinið og ráðherraræðið vísa sér leið. Enginn þeirra hefur sýnt
manndóm og sagt af sér.

Læt þetta nægja í bili enda er ég farinn að rífa hár mitt af örvinglun og
gremju yfir því að enginn ábyrgð sé sýnd, ekkert sé reynt til að stíga
spor í átt til réttlætis og uppbyggingu trausts og heiðarleika, heldur
virðist sem að dagskipunin sé að bjarga hinum fáu af Icetanic sem keyrðu
skipið í strand, og láta almenningin á neðri farrýmunum drukkna."

 


Hjörtur "hvítliði"

Hjörtur J. Guðmundsson (no comment) bendir á að nú þurfi e.t.v. að stofna borgaralegt varalið eins og gert var 1949!

Hverjir voru það nú aftur sem stofnuðu það??????     Er ekki einhver Benni Ólsari þekktur fyrir að vera vel handfastur - er hann ekki efnilegur í liðið með Hirti?       Tillaga að nafni á sveitinni:

                                                 HVÍTLIÐAR

Markmið:  Að berja Vinstri Græna almennt (og Ástþór ef hann kemur í höggfæri) og Hörð og Gunnar ef þeir sjást! LoL

Ps. Ætli Geir geti verið "liðsstjóri" - eða Hannes Hólmsteinn - hann vantar embætti við hæfi!Halo

Slæmt að komast ekki suður áður en byltingin er búin!     Bíllinn minn er enn í viðgerð! Devil

Kveðja,

Ragnar

 


Samábyrgð þingmanna!

Það er óhætt að segja að þessi dagur hafi verið glæsilegur í mótmælasögu Íslands og eins og konan sagði í sjónvarpinu: "Þetta er dagur eitt í mótmælum!"  Til hamingju Reykvíkingar, stjórnvöld fundu fyrir þessum mótmælum og þau voru ykkur til sóma!

Inni í þingsalnum var líka mótmælt og það kröftuglega af stjórnarandstöðunni að undanskildum Jóni Magnússyni sem skammaði stjórnarandstöðuþingmenn fyrir að vera á móti því að frumvarp hans væri á dagskrá.    Hann er ekki faðir Jónasar í Fjármálaeftirlitinu fyrir ekki neitt!  

Geir kom líka í ræðustól og sagði sem svar við fyrirspurn að ríkisstjórnin hefði unnið mikið verk í jólaleyfinu við björgun lands og þjóðar.    Þegar spurt var af hverju björgunarfrumvarpa sægi ekki stað í dagskrá þingsins varð fátt um svör og endaði Geir ræðuna á að tala um skort á vinnufrið og að ekki væri hægt að eiga orðastað við mann sem galaði eins og ræðumaður á mótmælafundi.   Var nokkur gustur á Geir úr ræðustólnum!    

Margendurtekin var ósk um að ríkisstjórnin segði af sér enda rúin trausti þjóðarinnar.    Það virðist líka sem traust stjórnarþingmanna sé að dvína því í viðtali í sjónvarpi RUV fyrir utan Alþingishúsið - á meðal mótmælenda - sagðist Karl V Matthíasson ekki viss um stuðning sinn við ríkisstjórnina.   Þannig að nú kemur kanske að því fljótlega að "öll vötn falli til Dýrafjarðar.!"

Enda er það svo að ábyrgð þingmanna er mikil, ekki bara stjórnarliða heldur allra þingmanna!   Með setu sinni á þessu þingi hafa þeir allir sem einn tekið beina og óbeina ábyrgð á orðum og gerðum ríkisstjórnarinnar.   Stjórnarandstöðuþingmenn, alla vega þingmenn VG neita þessu staðfastlega en hvað er það annað en meðvirkni og stuðningur að t.d. skipa menn í bankaráð nýju bankanna og ýmsar nefndir þingsins að beiðni ríkisstjórnar.   Þó hvorki VG eða Frjálslyndir beri ábyrgð á þróuninni undanfarna áratugi sem leiddi til hrunsins þá er ábyrgð þingmanna á setu stjórnar og þings eftir hrun mikil. Þar við bætist að mannorð þessara þingmanna hefur stórlega skaðast því þeir hefðu allir með tölu átt að vera búnir að segja af sér fyrir löngu.    107 dagar liðnir og enginn hefur axlað ábyrgð á stærsta hruni í heimi - alla vega miðað við fólksfjölda.  

Er það ekki með ólíkindum að við erum allan þennan tíma - yfir 100 daga - búin að bíða eftir landsfundi Sjálfstæðisflokksins?     Ég sagði það í október og segi það enn - því í ósköpunum þarf að bíða eftir úrskurði landsfundar smáflokks sem á bara eftir að minnka eftir því sem spilling hans og sérhagsmunagæsla kemur betur og betur í ljós.    Og árangur biðarinnar er nú að sjást - Geir segir mikið starf hafa verið unnið í jólaleyfinu - sýslumaður Árnesinga auglýsir harkalegar aðfararbeiðnir að 370 sunnlendingum!      Það er fínn samhljómur þarna!

 


Ábyrgð til þrautavara!

Það hefur verið sérstakt að hlusta á stjórnmálamennina undanfarna daga.    Ingibjörg varaði vinkonu sína við lausmælgi á baráttufundi, orð sem telja má ígildi þöggunar.     Geir sagði eftir að hafa setið fund með Robert Wade, spámannlega vöxnum hagfræðingi, að maðurinn vissi ekki nándar nærri því nógu mikið um Ísland og það sem verið væri að gera til að segja að gera þyrfti meira og eitthvað annað en gert væri.   Í fyrramorgun (12.-13. jan. 2009) var svo Árni M. Mathisen í viðtali og var spurður hvort hann hefði einhverntíma hugleitt afsögn.   Svarið var að "maður getur nú ekki neitað því  en þegar ég horfi til baka sé ég ekkert það sem gæti verið tilefni til afsagnar."        Svo er nú það.

Í dag 16. janúar, 2009 flytur svo forkona Framsóknarflokksins, Valgerður Sverrisdóttir ræðu á flokksþingi og segir að enga ábyrgð beri hún eða Framsóknarflokkurinn á því hruni sem orðið hafi á bankakerfi landsins!     Nei, nei, nei, þetta er alfarið Sjálfstæðisflokki og Samfylkingu að kenna!

Til að fullkomna þetta samþykkir flokksþing Framsóknarmanna svo að sækja um inngöngu í ESB ef Alþingi vill og ströng samningsskilyrði eru sett!     Hver er ekki opinn í báða enda?    

Er það bara ekki alveg víst að við eigum siðblindasta og spilltasta stjórnmálafólk alla vega á norðurhjara veraldar????   

Ég er jafnvel farinn að trúa að þetta sé upp til hópa vont fólk og hef ég þó alltaf reynt að hafa þá trú að allir væru góðir en það sæist bara misvel!    Það er hins vegar bara ekki eðlilegt þegar Valgerður skautar framhjá þátttöku Framsóknar í að koma á kvótakerfinu í fiskveiðum og kvótaframsalinu, í orkustefnunni og byggingu Kárahnjúkavirkjunar, í einkavæðingu ríkisfyrirtækja þar sem hún sjálf batt endahnútinn með sölu bankanna!    Nei, nei, ég er syndlaus, hvítur sem engill segir Lómatjarnarfrúin um sig og flokkinn!     

Geir er búinn að margsegja að hann beri enga ábyrgð á því ástandi sem nú er, vandamálin komi að mestu leyti frá Bandaríkjunum þó reglur hefðu mátt vera eitthvað strangari í viðskiptaheiminum hér og reyndar hjá ESB!   Ja hérna og svei því!!!    Ég held það hafi að jafnaði komið upp eitt hneykslismál á dag þá 100 daga sem liðnir eru síðan hrunið varð.    Það eru mörg dæmi um óeðlilega viðskiptahætti með og í fyrirtækjum, óeðlilega fyrirgreiðslu í bönkum, óeðlilega starfshætti ráðherra og fjármálaeftirlits og t.d. frændhygli (nepotism).      Allt er þetta eitthvað sem ekki kemur utanlands frá.   Eitthvað sem er í kerfinu hér og hefur viðgengist lengi - mjög lengi en er nú að fljóta upp á yfirborðið þegar brynvörnin brotnar.    Eitthvað sem íslenskt stjórnvöld og stjórnmálaflokkar bera ábyrgð á.     Eitthvað sem við - ÞJÓÐIN - vissum um en samþykktum eða gerðum ekkert til að stöðva!!   

Núna síðustu daga fréttum við af frændhygli í Landhelgisgæslunni en við þá stofnun hefur lengi loðað spillingarstimpill og má þar nefna rússneska sendiherrann sem bauðst til að selja okkur þyrlur helmingi ódýrar en aðrir en var ekki virtur svars!!!    Þá hafa peningarnir, 26 milljarðar kr, sem frændi emírsins í Khatar  átti að hafa borgað fyrir hlut í Kaupþingi, verið týndir í viku en nú heyrist að helmingurinn hafi verið sendur til Cayman Islands en hitt hafi verið lán með veði í hlutabréfunum sjálfum.

Þetta verður rannsakað gaumgæfilega af Fjármálaeftirlitinu sem eins og allir vita er líka að rannsaka starfsemi Stíms ehf, gjaldþrota eignarhaldsfélags sem eiginlega enginn á en hefur að því er virðist verið á framfæri fátæks útgerðarmanns.    Sú rannsókn hefur staðið í vel á annað ár og  er skýrslu efalítið að vænta  -   þegar rannsókn er lokið!!!!!  Enn tekst blaðamönnum þó ekki að draga orð upp úr forstjóra FME um þetta mál!!     Síðasta undrið núna er svo hvort Fjárfestingabankinn Straumur sem ég held að líka sé kallaður Straumur-Burðarás og er í eigu Björgólfs Thor, sé að stunda ólögleg viðskipti með gjaldeyri sér til ábata.    Kemur þá upp í hugann hvítþvottur á "svörtum" peningum.    Erum við ekki að fara að borga ICESAVE-skuldir Björgólfanna meðan þeir stunda "ábatasöm viðskipti" til að geta borgað skuldirnar af fótboltaliðinu West Ham?   Flott!

Ég hef síðan snemma í desember gert það mér til gamans að fara inn á fjármálavefinn Bloomberg.com til að sjá hvernig gangi á þessum hlutabréfamörkuðum og hvernig olíuverðið þróist.     Þarna á Evrópuvefnum er listi yfir félög með mestu viðskiptin hvern dag.     Þar hefur fyrirtækið Straumur-Burðarás alltaf skotið upp kollinum öðru hvoru og þá í svona 3.-6. sæti yfir mestu viðskiptin þann daginn!      Hefur mér alltaf fundist þetta skrýtið - svo skrýtið að ég skrifaði um það í bloggathugasemd einhvers staðar um viðskipti á Þorláksmessu eða Aðfangadag að þetta væru "skrýtin viðskipti og hvort einhver væri virkilega að kaupa hlutabréf í Straumi-Burðarás til að gefa í jólagjöf"!!!!!!!!!!!!!!!!!!!!!!!!!!!!!!!!!!!!!

En þetta verður vitaskuld allt rannsakað ítarlega af Fjármálaeftirlitinu, eitthvað sem ég skil ekki alveg hvernig þeir geta ef þeir eru búnir að rannsaka eins manns fyrirtækið Stím í hátt á annað ár án þess að komast að niðurstöðu um hvort allt sé með felldu.    Hjá Straumi-Burðarás starfa 500 manns og eins og segir á Wikipedia vefnum " Nú teygir Straumur anga sína til tíu landa, sem innihalda meðal annars Bretland, Danmörku, Svíþjóð, Finnland og Tékkland og er sjötta stærsta fyrirtækið í íslensku Kauphöllinni."  Eitthvað svona kolkrabbalegt og ekki á allra færi að kljást við - en FME getur það!!!!

Egill Helgason sagði reyndar í Kastljósi kvöldsins (16/1 2009) að Fjármálaeftirlitið spilaði í hinu liðinu, þ.e. útrásarliðinu!!     Það skildi þó aldrei vera að hópurinn væri allur í hinu liðinu, Geir, Árni, Ingibjörg, Guðlaugur Þór og hvað hann heitir viðskiptaráðherra (það er ekki furða þó Geir og Ingibjörg gleymi honum alltaf!) o.s.frv. sem öll hafa verið með leiðindi við okkur þegnana (ekki þjóðina!).     Nei,  það getur ekki verið, frekar vil ég kalla þau vitlaus!!!    En Egill sagði líka að FME hefði haldið yfir 100 fundi erlendis til að lofa ágæti útrásarinnar!     Ekki hef ég tölu á þeim, en grunsamlegt er þetta og víst er að fjármálaeftirlits-Jónas ber kápuna á báðum öxlum og liggur undir grun!

Það er alla vega ljóst að forsætisráðherra Geir H. Haarde ber ábyrgð á jafnt samráðherrum sínum sem undirmönnum öllum, hvað þeir aðhafast og segja - og ekki síður hvað þeir aðhafast ekki og segja ekki!  

Skyldi vera pláss fyrir fleiri en einn á Túvalu - þetta er 4. minnsta ríki veraldar "aðeins" 26 ferkílómetrar.  Ótvíræður kostur er að höfuðborgin heitir FUNAFUTI - sem gæti útlagst FUNAFAUTI!!!!!

Myndin hér fyrir neðan er frá Funafuti og heitir því góða nafni "Busy day at the market."

Funafuti_Busy_day_at_the_market


Íslenska efnahagsundrið!

Ég hef undanfarna daga verið að lesa og hugsa um ritgerð Stefáns Ólafssonar prófessors og hagfræðings úr veftímaritinu "Stjórnmál og stjórnsýsla".     Ritgerðin ber það ágæta nafn "Íslenska efnahagsundrið" og lýsir þróun efnahags íslendinga frá lýðveldisstofnuninni til þessa dags, hvernig fátæktin breyttist í velmegun og velsæld þó á ýmsu gengi.    Mér sýnist á öllu að þetta muni verða skrýtin bloggfærsla sambland af ævisögu minni og pólitískum upphrópunum því ég er í "vondu" andlegu jafnvægi.    

Þannig er að ég á son í USA sem er nú ekki í frásögur færandi nema hvað að hann fær TAKAYASU s.l. vor.     Núna á gamlárskvöld bætist svo grátt ofan á svart því þegar ég hringdi í hann um miðnættið var hann svona fárveikur að hann gat varla talað.    Gat þó hringt í 911 og komst á heilsugæslu og þaðan í flýti á sjúkrahús.    Þar kom í ljós að hann var með ígerð í heilanum og varð að fara umsvifalaust í heilaskurðaðgerð.     Tókst hún reyndar með ágætum.    Síðar kom í ljós að ígerðin var af völdum bakteríu er nefnist NOCARDIA og er ekki beint vinsamleg mannfólki.   Drengnum heilsast samt tiltölulega vel og maður vonar það besta.   Þó eru þessir dagar núna fremur þungir og því gott að "afreagera" með því að skrifa eitthvert bull og vangaveltur sem hrærast í höfðinu á manni.    Fyrir þá sem ekki vita þá er TAKAYASU ein tegund af s.k. slagæðabólgum, sjaldgæf mjög og leggst einkum á ungar konur frá Austurlöndum fjær!     Lífið er stundum skrýtið!

En víkjum nú aftur að grein Stefáns Ólafssonar.   Það er ákaflega umhugsunarvert fyrir mig að horfa á súluritið á mynd 2. (Því miður get ég ekki náð súluritinu út úr greininni til að birta hér en vísa til greinarinnar!)  Mér sýnist að þetta sýni líf mitt nokkuð í hnotskurn!!!   Þar sést að mjög erfið ár koma í upphafi lýðveldisins - ég er fæddur 1945 svo það er eðlilegt! Pabbi, sem ég líkist nokkuð - bara latari - byggði 2 íbúðarhús árin 1946-50, hann hefur verð jafn heppinn og snjall og ég í sínu basli (reyndar mun betri því ég hef aldrei byggt íbúðarhús - en minkahús reyndar og fór flatt á því)!  

Þegar ég hugsa um það þá hlýtur pabbi að hafa verið í fullri vinnu til að framfleyta fjölskyldunni, konu og 7 börnum.    Hann hefur því byggt þessi hús á kvöldin og nóttunni enda maðurinn víkingur duglegur.     Eins og sönnum verkamanni sæmdi trúði hann á Sjálfstæðisflokkinn og elskaði Ólaf Thors!     Mamma fullyrti að hann hefði oft látið helminginn af laununum sínum renna í flokkssjóðinn þegar þar var þurrð!     En það verður ekki við öllu séð.  Hann lenti í nefnd fyrir flokkinn en þá komu upp hagsmunaárekstrar milli samviskunnar og flokkshollustunnar og samviskan vann og hann greiddi atkvæði með kommunistum um eitthvert mál!     Það fór allt í háaloft og menn rifust.     Það þoldi pabbi ekki og fékk hjartaáfall og dó, 52 ára.      Þetta er ættarfylgja og þess vegna vil ég endilega hafa sjúkrahúsið hér á Sauðárkróki í því horfi sem nú er því ég er fastagestur þar svona 3. hvert ár síðan 1991.    Er næsta víst að ég mundi ekki lifa af flutning til Akureyrar jafnvel þó vegurinn sé orðinn góður og Giljareitirnir horfnir!       Líður mjög að því að ég slái aldursmet karlmanna í þessum ættlið en meðallífaldur þeirra er ca. 52-53 ár en ég brátt að ná 64. árinu!   Þetta var um "harðindaárin" 1946-1949!

Næsti harðindakafli kemur 1967-1970.      Það passar alveg því þá er ég í háskóla úti í Kaupmannahöfn.      Eru mér þessi ár mjög minnisstæð því gengisfellingarnar gerðu þessi litlu námslán sem fengust að nánast engu og gjaldeyristakmarkanirnar voru slíkar að það var nánast engan gjaldeyri að fá.     Ég skil ekki enn í dag hvernig mamma gat sent mér þann gjaldeyri sem fékkst og svo nokkra 100-kalla í viðbót sem ég gat farið með í neyð og skipt í bankanum á "Hovedbanegaarden".     Það var hennar afrek að ég gat borgað húsaleigu, bækur og fékk oftast eina máltíð á dag - sem ég eldaði  sjálfur.    Þetta voru samt sannkölluð harðindaár og ekki síst fyrir mig "sveitamanninn" voru þessi ár erfið því ofan á þetta peningahallæri bættist óskapleg ótíð með stórkostlegra kal í túnum en ég held að hafi sést fyrr né síðar!      Þar við bættist fiskleysið/síldarleysið sem auðvitað olli gengisfellingunum sem voru að drepa mann.      Þannig kynntist ég harðindunum 1967-70.   

Síðan kemur góðæri sem, að einu ári undanskildu varir alveg frá 1970 til 1989.     Þess sést til dæmis engan stað að árið 1979 var alveg hryllilegt ár fyrir bændur - og þá var ég orðinn bóndi.   Kalt og vont vor - stórhríð á 17. júní, vont sumar, tún alveg graslaus og leiðinda haust!      En fiskafli hefur sjálfsagt verið með ágætum.

1983 var hins vegar vont ár samkvæmt línuriti Stefáns og það passar alveg ágætlega.     Ég átti nefnilega nokkrar kindur en upp í þeim kom riða veturinn 1983-4 svo ég varð að skera niður.    Þá var sú hugljómun uppi að loðdýrarækt gæti bjargað, ef ekki heiminum, þá alla vega riðubændum svo ég fór í að byggja upp loðdýrabú í góðærinu 1985-6.     Haustið 1987 var alveg frábært loðdýraár og himinhá verð fengust fyrir skinnin enda var ég þá að kaupa lífdýrin - að sjálfsögðu á himinháu verði.      1988 var heldur lakara loðdýraár enda setti ég mikið á og stækkaði búið!

Árin 1988-1991 eru svo síðasti harðindakaflinn í súluriti Stefáns, ekki voðaleg harðindi en leiðinda ár í tekjuþróuninni, samt miklu betri en vondu harðindin 1946-1949 og 1967-1969.      Ég fann hins vegar mjög vel fyrir erfiðleikunum því nú hrundi verð á minkaskinnum niður úr öllu valdi.     Með himinháan skuldaklafa á herðum sá ég mér þann kost vænstan að hætta og flytja á mölina.     Kiknaði þó aldrei alveg en nærri var það!      Áhyggjurnar voru þó til staðar og áðurnefndur erfðagalli fyrir hjartveiki fór að kynna sig endaði með hjartaáfalli 1991.     Ég lifði það dálaglega af og það sama virðist þjóðarskútan hafa gert því því samkvæmt súluriti Stefáns er hóglegt góðæri fram til 2009.      Reyndar segir Stefán að þetta sé falskt góðæri sem byggt á lánsfé og ójöfnuður í þjóðfélaginu hafi aukist öllum nema fáum til ama og leiðinda.       Svo skrítið sem það er þá er það sama að segja um líf mitt og heilsu.     Þó allt virðist á yfirborðinu slétt og fellt er þung undiralda, ég er búinn að fá nokkur hjartaáföll,  hvítblæði og annað sem hefur gert mér lífið leitt og erfitt og gert það að verkum að ég hef einmitt lent í þeim hópi fólks sem hefur hvað mest orðið fyrir hinu falska góðæri, nefnilega öryrkjum og öldruðum!      Og mér sýnist að nú í kreppunni eigi að höggva þetta fólk á borðstokknum ef svo má að orði komast - það er ráðið til að fleyta þjóðarskútunni gegnum skaflinn hennar Ingibjargar (sem hún er búin að vera að moka alla vega síðan í nóvember!Smile   Ef ég ætla að taka súlu Stefáns fyrir 2009 með í þetta lífshlaup mitt þá líst mér satt að segja ekki á blikuna því svona súla hefur ekki fyrr sést í mínu lifi.    Því held ég að best sé að stoppa hér með samlíkinguna og láta bara hverjum degi nægja sína þjáninguSmile

Umfjölluninni um grein Stefáns er þó hvergi nærri lokið því ályktanir hans um hið raunverulega og hið falska góðæri íslensku þjóðarinnar sýna svo ekki verður um villst að við höfum tekið rangan afleggjara á ferð okkar inn í framtíðina.    Það er líka greinilegt þó það sé hvergi sagt í grein Stefáns að stjórnvöld eru gegnsýrð af spillingu, sérhagsmunagæslu og ábyrgðarleysi og þjóðin er einhvern veginn meðvirk - hún umlíður þetta og virðist ekki hegna fyrir spillinguna á nokkurn hátt, hvorki í kosningum eða hinu almenna lífi.     Það má eiginlega segja að á þessu sviði sé þjóðin greindarskert eða að það vanti í hana eðlilegt mat á siðferði og því hvaða afleiðingar brot eiga að hafa.      Það er mikið talað um mikilvægi menntunar en ég hef á tilfinningunni að það sé öfugt hlutfall milli menntunar og siðferðis - því meiri sem menntunin verður því lægra verður siðferðisstigið.  Vonandi er þetta rangt því þá er verið að afsiða þjóðfélagið!!

Meginástæðan fyrir því að ég fór að velta grein Stefáns svona mikið fyrir mér voru þó ekki orð hans sjálfs heldur tilvitnanir hans í bók Hannesar Hólmsteins Gissurarsonar "Hvernig getur Ísland orðið ríkasta landi í heimi?" sem hann gaf út 2001.     Ég er nú ekki mikið lesinn og hafði aldrei heyrt af bók þessari en tilvitnanir Stefáns og umsagnir um bókina og um önnur skrif Hannesar gengu alveg fram af mér!   Ég ætla að ljúka þessari færslu með tilvísun í það sem í ritgerð Stefáns stendur um bók Hannesar.

Færslan opnast í WORD

Sé einhver maður sem á skilið "heiðurinn" af að hafa komið Íslandi á vonarvöl og gert það að þeirri gróðrarstíu spillingar og óhroða sem nú er að koma upp á yfirborðið þá finnst mér það vera Hannes Hólmsteinn Gissurarson. Hann hefur þar vissulega notið liðsinnis margra en hugmyndafræðin virðist alfarið vera hans að því er að Íslandi snýr.

 

          


Skrár tengdar þessari bloggfærslu:

ESB er ekki málið - NÚNA

Nú er mikið talað um aðildarviðræður að ESB, mjög þreytandi umræða um hvort efna eigi til þjóðaratkvæðis um málið eða ekki og menn mjög ósammála um allt, meira að segja segja sumir að engar reglur séu til um þjóðaratkvæði.    Þvílík kvöl og pína!!!!!!

Mér finnst hins vegar að það þurfi eitthvað að gera áður en farið er að tala um aðildarviðræður af einhverri alvöru.     Við erum hér með hrunið bankakerfi sem verið er að lappa upp á - eða ef til vill falsa svo það verði frambærilegt og leiði ekki til fjöldahandtöku fólks fyrir fjársvik og jafnvel landráð því slík hefur vitleysan verið.    Við höfum líka til viðbótar

við ónýtt bankakerfi, ónýtt stjórnkerfi þar sem ótal vitleysingar ganga lausir og gætu spjallað hina bestu samninga.   Ríkisstjórnin er eins og hún er, að flestra mati vanhæf til allra aðgerða - og það sem gert er verður flest til meiri skaða en gagns.     Síðasta dæmið um það eru ICESAVE samningarnir og málaferlin vegna þeirra sem virðast vera að renna á óskiljanlegan hátt út í sandinn.     Ótrúlegir samningar þar sem sífellt var klifað á orðum Björgólfs Guðmundssonar að eignir Landsbanka dekkuðu Icesave-skuldirnar mjög vel, en þegar upp er staðið falla hundruð milljarða á okkur.    Og embættismaðurinn sem á að sjá um að stefna Bretum í Icesave-málinu er að koma úr hálfs mánaðar fríi og veit ekki einu sinni hvenær lokafrestur til málshöfðunar er.     Traustvekjandi!!!!!         Svona er allt kerfið, heitir það ekki Stjórnarráð?    Ríkisstjórn, ráðuneytisstjórar og æðstu yfirmenn, sendiherrar, Seðlabankafólkið, starfsfólk Fjármálaeftirlits o.s.frv., o.s.frv. - Þetta lið, ráðherrar eru þjóðkjörnir en hitt er allt meira og minna skipað af pólitískum toga jafvel í dómskerfinu og starfar oftast samkvæmt því.

ÞETTA LIÐ ÞARF ALLT AÐ FARA FRÁ KJÖTKÖTLUNUM ÞAR SEM ÞAÐ HEFUR ORNAÐ SÉR ÞJÓÐINNI TIL AMA, SKAPRAUNAR OG SKAÐA.

ÞAÐ ÞARF AÐ GERAST ÁÐUR EN FARIÐ ER AÐ SVO MIKIÐ SEM HUGSA UM INNGÖNGU Í ESB.    Þetta er allt vanhæft fólk sem ekki á að vera við stjórn og samningagerð á vegum þjóðarinnar.

Þess vegna þarf að halda Alþingiskosningar strax og fá fram skýran vilja þjóðarinnar um hverjir eigi að sitja á Alþingi.     Vonandi velst þangað heiðarlegt fólk sem hefur stefnu sem samræmist því siðferði sem við viljum hafa í hávegum, jafnræði og mannúð.  

Það mun svo efalaust taka einhver ár að koma lagi á samfélagið, koma bankamálunum á hreint, og hreinsa upp þann skít sem er í öllum hornum og undir teppunum.    Það þarf líka að þétta lagaumhverfið og læra þar af því sem á undan er gengið, breyta stjórnarskrá, kosningalögum, lögum um fjármál stjórnmálaflokka og stjórnmálamanna, og svo mætti áfram telja.    Inn í þetta dæmi getur einhvern tíma komið umsókn um aðild að ESB.     Það er bara ekki tími til þess núna, fyrst þarf að velta við steinum og hreinsa andrúmsloftið sem er þrungið illum hugsunum og hugleiðingum sem er afleiðing þeirra lyga, undirferlis og svika sem þjóðin hefur orðið vitni að og orðið fyrir.


Fjárdráttur Alberti's og samsvörun í nútímann

Þann 8. september 2008 voru 100 ár liðin síðan Daninn Peter Adler Alberti játaði á sig fjárdrátt í sparisjóði sem hann hafði stjórnað í langan tíma, frá 1890.    Alberti var dómsmálaráðherra Dana 1901 þar til um mitt ár 1908 og var svo Íslandsmálaráðherra í hjáverkum 1901 til 1904 þegar hann skipaði Hannes Hafstein Íslandsmálaráðherra með sæti í Reykjavík (Heimastjórnin).     Alberti var harðdrægur maður eins og danir lýsa honum "Som taler var han uforfærdet i forsvar og ubarmhjertig i angreb."    Hann innleiddi hegningu fyrir kynferðisafbrot, allt að 27 vandarhöggum sem karlmenn á aldrinum 15 -55 ára áttu að þola fyrir nauðganir og valdbeitingu.    Vinsældir Alberti döluðu eftir sem á leið þar sem hann þótti hygla sjálfum sér of mikið.     Var hann því látinn hætta sem ráðherra í ágúst 1908 en fékk titilinn "geheimekonferensråd" sem er aðalslegur heiðurtitill.   Um mitt ár 1908 komu tveir endurskoðendur frá ríkisendurskoðun á skrifstofu dómsmálaráðherrans og vildu fá aðgang að skjölum í bankahólfi embættisins.     Alberti varð mjög reiður og sagði þetta móðgun við mann í hans stöðu.    Þegar annar endurskoðandinn hélt sig fast við að vilja lyklana að skápnum, rétti Alberti honum þá og sagði: "Herrar mínir, ef þið opnið þennan skáp er ég ekki dómsmálaráðherra lengur."    Við það guggnuðu endurskoðendurnir og drógu sig til baka!   Þann 8. september fór Alberti sjálfur í dómshúsið í Kaupmannahöfn og játaði fjársvik.     Það var þó víst aðeins dagaspursmál að fjársvikin væru opinberuð af dagblaðinu Politiken.    Þetta var reginhneyksli, sérstaklega þar sem Friðrik 8. var nýbúinn að veita honum þessa mjög háu viðurkenningu eftir ráðgjöf forsætisráðherrans J.C. Christensen sem í kjölfarið varð að segja af sér og ríkisstjórnin fór frá.     Alberti fékk svo 8 ára fangelsisdóm fyrir fjársvikin en þau fólust einmitt í að hann var í hlutabréfaviðskiptum með peninga sparisjóðsins og hafði tapað 15-18 milljónum DKK, um 1 milljarði DKK að núvirði!

 

Það er svolítið sérstakt að lentum við íslendingar í fjármálahneyksli (sem hluti af Danaveldi) sem svo er að endurtaka sig nú 100 árum síðar.     Og enn skrýtnara er að það er maðurinn sem skipaði Hannes Hafstein fyrsta ráðherra Íslands sem lendir í þessu og Hannes Hafstein er svo einn af uppáhaldsmönnum Sjálfstæðisflokksins (og margra annara reyndar!) sem segja má að sé "velgjörðarflokkur" okkar í sambandi við núverandi bankahrun! Má ekki segja - enginn Sjálfstæðisflokkur = ekkert bankahrun - eða er það of langt gengið??!

 

Óskandi væri þó að núverandi ríkisstjórn tæki þá snöfurmannlegu ákvörðun að segja af sér sem fyrst - hún hefur þarna 100 ára gamla fyrirmynd og tilefni afsagnar í dag er ólíkt meira finnst mér!


Stytta af Alberti

Þessi frétt á mbl.is   "Stytta af Alberti rís á næsta ári" minnir á að það er sjálfsagt og hæfilegt nú að minnast Alberti sem var Íslandsmálaráðherra um aldamótin 1900 og valdi að gera Hannes Hafstein sem fyrsta ráðherra Íslands með aðsetur hér heima.     Alberti varð það svo á að draga sér fé úr sparisjóði danskra bænda sem hann stýrði og nam upphæðin um 1.000.000.000 Dkr á núvirði (2007).   Peningunum tapaði hann m.a. á hlutabréfabraski.    Hann var dæmdur í 8 ára fangelsi og sat inni i 5 ár.       Það er e.t.v. eitthvað til umhugsunar og eftirbreytni fyrir íslensk stjórnvöld en alla vega má minnast Alberti ekki síður en Alberts Guðmundssonar fótboltahetju okkar þó sennilega verði nú ekki reist stytta af þeim danska!     Og er ekki Hannes Hafstein eitt aðal átrúnaðargoð   Sjálfstæðismanna?Grin 

  Sjá Wikipedia dönsk útgáfa og íslensk


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband