Háttvirtur, hæstvirtur eða venjulegur

Ég  get ekki gert eins og Geir H. Haarde slappað af og lesið glæpasögur!   Því hef ég öðru hvoru horft á sjónvarp frá Alþingi en það er ekki hægt að gera mjög lengi í senn m.a. sökum þessara sífelldu endurtekninga.    Þannig held ég að i umr. um fjárlög hafi Ögmundur í góðri ræðu  nefnt bréf til heilbrigðisstofnana um 10 % flatan niðurskurð hið minnsta  3-4 sinnum í sinni ræðu - og svo kom Guðlaugur heilbrigðisráðherra víst á eftir og sagði að þetta væri bara alls ekki satt.   Það var vel eftir miðnætti kl. 030 eða meira.    Núna rétt í þessu(16/12, kl 1945) opnaði ég svo aftur fyrir Alþingissjónvarpið og svei mér ef Ögmundur er þá ekki að mótmæla Guðlaugi Þór og sýnir fram á að hann fer vísvitandi með ósannindi um þetta!      Þetta er nú meira liðið!    

Þetta átti þó ekki að vera málið hjá mér - það er gott að líta á smáatriðin þegar maður er reiður og sár.

Ég hélt í fávisku minni að í Þingsköpum Alþingis eða Stjórnarskrá væri kveðið á um smæstu atriði í starfi þingsins.     Þetta var ég að skoða af því mér finnst að þingheimur sé að setja sig skör ofar almenningi í talsmáta og klæðaburði.     En það kom sem sé í ljós að þessi atriði hafa ekkert með þingsköp eða stjórnarskrá að gera heldur eru skráð í bókarkorn er nefnist "Háttvirtur þingmaður" sem kennir mönnum "þingmannasiði".        Þar eru eftirfarandi klausur um málið:

Löng hefð er fyrir formlegum og snyrtilegum
klæðnaði þingmanna við þingstörfin, í þingsalnum
og á fundum þingnefnda. Venjan er
að karlmenn séu í jakka og með hálsbindi,
en meiri fjölbreytni er í klæðnaði kvenna.

Það er föst þingvenja að alþingismenn eru ávarpaðir á
þingfundum „háttvirtur þingmaður“ („háttvirtur 11. þingmaður
Suðurkjördæmis“, „háttvirtur þingmaður Jóna Jónsdóttir“)
og hafa forsetar jafnan gert athugasemdir ef út af er brugðið.
Á sama hátt er föst venja að ávarpa ráðherra „hæstvirtur ráðherra“
(„hæstvirtur forsætisráðherra“ t.d.).
Forsetar eru ávarpaðir „herra forseti“ eða „frú forseti“ eftir því
hvort í forsetastól situr karl eða kona. Enn fremur má nota ávarpið
„forseti“ og „hæstvirtur (-i) forseti“, en síður „virðulegur (-i) forseti“og alls ekki „háttvirtur (-i) forseti“.

 Margt breytist á löngum tíma og í mörgum tilfellum er það ágætur siður að laga sig að háttum samtímans en vera ekki eins og sauður aftan úr forneskju.     Það á ekki síst við um klæðaburðinn.  Að gefa konum meira frjálsræði en sé ekki vilji til að breyta þessu þá á að minnsta kosti að gera þá kröfu að konur haldi jómfrúræðuna á evuklæðunum einum fata.   Það mundi tryggja sjónvarpsáhorfið þann daginn.

Hvað virðingu þingmanna áhrærir þá höfðu þeir í þann tíma óskoraða virðingu fólksins og þeim var treyst.     Þá var flokkamyndun ekki jafn sterk og nú þannig að menn höfðu sannfæringu og fylgdu henni oft.     Nú er engu slíku til að dreifa, virðing almennings fyrir Alþingi er að engu orðin sem og virðing fyrir alþingismönnum sem fólk sér nú að eru bara aftaníossar flokka sinna og skeyta hvorki um skömm né heiður.      Þetta sýna allar skoðanakannanir svo ekki verður um villst.    Væri því ekki óeðlilegt að þeir tækju upp íslenskt mannamál,  og hættu að há- og hæstvirða hvor annan - það má vera kurteis án þess - og kostar ekki neitt.      Annar ósiður er að þingmenn mega ekki ávarpa þá eða þann sem þeir tala við heldur skulu beina orðum sínum til þingforseta!      ÞESS VEGNA KEMUR Í TÍMA OG ÓTÍMA SETNINGIN "HÆSTVIRTUR FORSETI"  - það er þegar menn fara út af sporinu og byrja að skamma ríkisstjórnina eða einstaka þingmenn beint eða ef þeir hafa tapað þræðinum  - er þá ekki þögnin betri?  

Vinnutímalöggjöfin er ekki í miklum hávegum höfð á Alþingi.     Hér þarf að verða breyting á og er það lágmark að lög um vinnutíma vörubílstjóra verði látin gilda á Alþingi líka nema að viðurlög við brotum verði tvöfölduð á þingmenn og fjórfölduð á sitjandi forseta á hverjum tíma!    Þessir menn eru að véla um örlög þjóðarinnar eða mjög umdeild mál og þeim (myrkraverkunum) er oftast eða ævinlega skipaður tími "eitthvað út í nóttina" þegar menn eru meira og minna meðvitundarlausir, samanber eftirlaunalög hin fyrri og síðari og síðustu fjárlög!    

Með kveðju,

Ragnar Eiríksson

 

 

Athugasemdir

[Árni Gunnarsson, 25.12.2008 kl. 18:30]

Þegar þú verður orðinn þingmaður Ragnar minn þá mun ýmislegt líta öðruvísi út. ( þú horfir á hlutina "með öðrum hætti." "Það er alveg furðulegt að verða vitni að því að háttvirtur fjórði þingmaður Norðurlands suður skuli leyfa sér að ræða um málið með þessum hætti!" "Hvernig dettur háttvirtum þingmanni í hug að neita staðreyndum með þeim hætti sem við urðum vitni að?" "Við verðum að venja okkur af að hugsa með þessum hætti."

Ég hef áhyggjur af því með hvaða hætti við eiginlega losnum við háttvirta alþingismenn og hæstvirta ríkisstjórn.

[Ragnar Eiríksson, 25.12.2008 kl. 21:05]

Ég hef alltaf verið alveg ómögulegur í þessu háttarugli en er 4. þm. Nl.S ekki alltaf í afhentum hætti -stýfðum?   Já heldurðu að það verði munur - ef ég kæmist nú í fjármálaráðuneytið - ég hef aldrei getað séð fótum mínum forráð og aldrei getað haldið kjafti yfir nokkrum hlut stundinni lengur!      Seðlabankinn er sennilega ekki möguleiki - en þar mundi seinni kosturinn minn vera verðmætur miðað við núverandi stöðu þar!!!

Ég held það þurfi svona tæki sem heitir AK47 - kaupum svoleiðis!     Annars var ég að hugsa um að koma suður -ef ég fæ bílinn gegnum skoðun - eftir áramótin og reyna svona  Gandhisk mótmæli fyrst!       Taka Samfylkingarþingmennina með "Vottum Jehova" aðferðinni (Ná þeim í bólinu og fá þá til að segja "HALLELUJA") !    Ég spyr: "Afskrifa skuldir Milestone og veita þeim víkjandi lán og gefa þeim 13 milljarða í hlutafé?   "Segi þeir Já, HALLELUJA" þá er það bara fínt - við vitum hvar þeir eru.  Segi þeir Nei, þá er það enn betra því þá verða þeir að fylgja sannfæringu sinni og krefjast afsagnar FME og ríkisstjórnar verði gjörningurinn framkvæmdur.   Sama á við um það ef fara á að afskrifa gjaldmiðlaskiptasamninga útgerðarmanna (þeir eru óraunhæfir segir LÍÚ!!).      Svona verður að hanka þá - hafi þessir menn einhverja samvisku  - sem ég reyndar efast stórlega um - samanber Ellert B. Schram þingmann öryrkja og ellilífeyrisþega og jábróðir fjárlagafrumvarpsins og alls annars óréttlætis sem samþykkt hefur verið!!!!!  HANN ÞARF REYNDAR EKKI AÐ KVÍÐA ENDURKJÖRI maðurinn sá!!

Varðandi framboð þá fer ég að stefna að því að ryðja Jóni eða Kristni af þingi - er það ekki - ég er svo ofsalega vinstrigrænn - eða a.m.k. grænn.   Og nógur er vaðallinn og sennilega nóg pláss í Norðurlandskjördæmi suður!!!

Jólakveðja

Ragnar